رواية نصيب ليبيا الحلقة السابعة للكاتبة بنت الزاوية
رواية نصيب الحلقة السابعة 7
عبد المولي : باهي يابنتي اني سعيد بقرارك هذا و انك تبي تتزوج و شن عندي ليك غير اني نتمني الهني ليك صدقيني يابنت الراجل نعرفه زي نفسي خاله شيخ كبير و عيله محافظة
نصيب : عارفة يابوي و انت وقت جيت قتلي اول شيء درت العياط بس لاني حسيت روحي صغيره و منقدرش نتحمل المسؤوليه بس بعدين حسيت ان ضروري ننتقل من مرحله المراهقه و نكون واعية شويه
عبد المولي حط راسه يمسح علي بنته و ابتسم
عبد المولي : بنتي كل مره نقولك انك مجنونة شوية ووو
نصيب : يابوي شن مجنونة شوية؟!
عبد المولي : لالا مجنونة هلبا و بالفعل و لما تضربي ف صغار الجيهه و يجو اماليهم يقولوا ليا بنتك تبي قرقارش نصدق و نقول بالفعل بنتي معندهاش عقل بس اني معمريش قمت منك يدي كنت عارف انك رح يجي يوم نلقي فيك هذيكا البنت الحشوميه و يلي تسمع الكلام و يلي رح تكون اوعي حتي مني
نصيب : يابوي صدقيني اني نحاول بس اني تكون راضي عليا دنيا و اخره يابوي هذا بس يلي نبيه
عبد المولي : وني راضي عليك يابنتي و انشاء الله رح نحددو كل شيء
نصيب زمطت ريقها : ايه يابوي يلي تشوفه عن اذنك توا نبي نرقد عندي قرايه بكري
عبد المولي : بري يابنتي ربي يعيطك علي قيس نيتك الطيبة
ابتسمت ليه نصيب و باست راسه
نصيب : تصبح علي خير
عبد المولي : ونتي بخير يابنتي
و طلعت و كمل عبد المولي تلاوه القرآن من اجل نصف الليل
خشت لغرفتها و قعمزت علي سريرها و اتكتت قعدت تشوف للشقف و الف فكره و كلام ف راسها الف شيء سبب ليها صداع
مسحت ذهنها من الافكار و غمضت عيونها و امنت ان يكون غدون احسن ❤️
———————
صباح اليوم يلي بعده تجهزت نصيب بعد مصلت و نزلت لقت فادية في المطبخ
نصيب : صباح الخير
فادية بابتسامة : صباح النور حبيبتي
نصيب : كيفك بنتي شن اخبارك اليوم
فادية تدير ف المعمول : نحاول نكون بخير 🤷🏻♀️
نصيب قربت منها و قعمزت جنبها
نصيب : لميني هذا كله تديري فيه
فادية ساكتهه !! و تدير
نصيب : اني نعرف ان هذا كله صعب حبيبتي نعرف انك خدو منك ولدك بطريقه مستحيل تنسيها يعني هما وحوش يكف قدرو يفرقوك علي ولدك
فادية : عادي ف الاخير معاه بوه علاش بنكثرت لامره
نصيب مسكتها من خدودها : شوفيلي بنتي اني رح نوعدك ان ولدك يرجع ولدك رح يوجع و لحضنك
فادية : 😭😭 استحشته يانصيب
نصيب : عارفة 😭😭 بس اني وعدك رح نرجعوه مستحيل ان نسكت لظلم يلي يصير و حضنت فادية
———————
نادر : متعرفيش تسكتي عيل متعرفيش النم نبي نرقد
صابرين : شني تشوف فيا بيبي ستر هذا مش ولدي باش نسكته
نادر كان شاد ولده بطريقه مش مريحه للعيل و يعيط و عروقه بينات الولد جيعان و يبي يرضع و مش عارفه حد كيف يتعامل معاه
نادر : حتي انتي عمته ولا شديته قدام مرتي هيكي و خلاص
صابرين : اسمعني اهني اني معنديش صغار و اكيده مش رح نجرب اني تكون امومتي علي ولدكم حبيبي
نادر : لانك اصلا متعرفيش تتعاملي معاهم
صابرين : علي الاقل وقت نديروهم مش رح نسيبهم زي مرتك
نادر : اتذكري انك من فكتيه منها !!
صابرين جت بترد طلعت سالمه جايبه المرضعه تخض فيها و تفنص ف صابرين
ابتسمت سالمة
سالمة : ياولدي جرب بالك يسكت او هاتته اني مربيه و نعرف نتعامل مع حفيدي
عطهولها نادر باهمال و قارن حواجبه الولد اول محطوله المرضعه سكت و بدي يشوف لجداه يلي تبتسم ليه
نادر : و اخيراً حطيه يام ف داره و خلوني بنرقد صدعلي راسي امس
سالمة : حاضر ياولدي ارقدي مش رح نسيب حفيدي
————
نصيب كانت تمشي قريب توصل للمدرسة و حاطه السماعات ف ودنها لين شدها حد من يديها
نصيب : تييي منييي !!
سراج : شني معاش عرفتيني
نصيب : سراج ؟!
سراج : ليا نص ساعة نكلم فيك و نت متجاهله
نصيب طلعت من ودانها السماعات و ورتهمله و قلبت عيونها و كملت مشيها
سراج : استني استني اني قاعد نتكلم معاك
نصيب : الظاهر اني منبيش نسمع هذا باش مستمره اني نمشي 🙂💔
سراج : قصدي ليش مصره انك تطولي لسانك معاي
نصيب : لاني بطبيعتي لساني طويل 🤷🏻♀️🔥
سراج ضحك و مسكها من يديها و حطها علي جدع الشجره
نصيب : تي حول شن تدير حوول !
سراج : ليش بديتي جافه شنو صار
نصيب : جافه جديات تشوف فيا جافه !! اوه سامحني سيادتك لانك كنت متغيب عليا اسبوعين
سراج : انتي تعرفي اني نحب ناخد فتره استراحه
نصيب : شن قالوك كتاب تقري فيه اني او لعبه او مكينه باش تلعب عليها وقت تبي و امتا تدهشش ترتاح ؟
سراج : نصيب شن الكلام يلي تقولي فيه نسيتي تصرفاتك نتي ؟
نصيب : تصرفاتي شنو يلي درته ؟
سراج : اني راجل منحبش حد نتصل بيه ميردش منبيكش تطلعي امتا اني منبيش المكان اني مسؤول عليك
نصيب : من امتا ياحظي
سراج : انتي تعرفي ان هذا من قبل و انك تسمعي ف كلامي شن غيرك
نصيب : متغيرتش بس ممكن تقول بعض ظروف تغير الانسان
سراج : و شن هي الظروف او ديما فادية تزعلي لزعلها و ترضي لراضها
نصيب : شنييي
سراج : اكيد يعني حياتنا مش رح تكون فادية وبس
نصيب رمت يديها و ضربته كف
سراج لمس خده و شاف ليها بصدمه
نصيب : اممم فادية تكون اختي تعرف شن معني اختي و اكيد حياتها متصله بحياتي و و زي مقلت ياصقر ربي يسمعنا علي بعضنا كل الخير
و مشت و سيبته
**
فادية : يابوي زي مقتلك قراري و خديته و توا دوق شن درتت
عبد المولي سكت و خدي منها المعمول و كلاه و مسح يديه و ناض للجامع
نوال : يابنتي صدقيني احني مناش مضايقين منك تمام بس فكري ف ولدك
فادية : يام ولدي نحبه و نبيه و مقتطعه الف قطع حالياً تخيلي رضيع خدوه مني بس حتي هو بوه منبيش بوي ياخده منه نبيه يتعذب باش يعرف قيمتي
نوال : يلي تشوفيه يابنتي ....
——————
نصيب كانت ف الحصه و تحاول تركز بس تتذكر انها ضربت سراج كف كيف تجرأت ! كل هذا الغضب يلي فيها و كلام يلي قاله مقدرتش انها تتملك اعصابها
الاستاذة : ياطالبه ياطالبه !!
نصيب نفضت افكارها و شافت ليها
الاستاذه : شنو وين كنتي سارحه
نصيب : لا معاك !
الاستاذه : واضحح واضحح مش مركزه بكل معاي
نصيب : نقولك حاجه اصلا انتي متشرحيش كويس باش الواحد يركز معاك
الاستاذه : عفوا؟!
نصيب : ريتي يلي ف الفصل اكلهم بعد متطلعي يتشفعو منك ! ميفهموش منك
الاستاذه : انتي بس يلي مش مركزه الكل مركز و يجاوب فيا
نصيب : لانهم مدايرين كورسات ياحلوه مش من بلاش يجيبولك ف الجواب 😏
الاستاذه : ميهمنيش الكل يديرو فيه باش
مراجعه و ني معنديش مانع
نصيب : لا بالك بتمنعيهم انقولك راسك يلي زي السطالايت مكش فاهمه منه و فمك يلي بوتكس ميوصلش ف المعلومه
الاستاذه : ياقليله الادب كيف تتكلم معاي بالطريقه هذي
نصيب : والله قلت الحق !
الاستاذه : اطلعي البرا بري لمكتب المديره البرا
نصيب : يسعدني سماع هذا لان اصلا مليت من الحصه التافهه هذي 🙂
و طلعتت
مشت لعند المديرة
المديره : ايه زي مقتلك سلم دفتر الاعمال نهايه العام يااستاذ ايه ايه
المديره : نعم؟ شن تديري هني انتي
نصيب : والله الحق لزتني الاستاذه
المديره : علاش طلعاتك
نصيب : لاني قلت الحق ليها
المديره : شني !
نصيب : قتلك تكلمت معاها بكل شفافيه و قلتلها الحقيقه علي معاناه الطلبة منها فاهي متحملتش الحقيقه المره و لزتني بكل ادب 🤭
المديره : حقيقة مره ؟! شني قللتي ادبك مع الاستاذه
نصيب : زي مقتلك اني انسانه متربيه و نقول ف الحق
و حطت رجل علي رجل
المديره : عدليي رجلك و خلي تم الحصه حسابك معاي بعد منفهم من الابلة
نصيب ابتسمت : اوه حقاً هذم صغارك يلي ف الصوره يججنونوو و رجلك بسم الله مشاء الله عليه
المديره : 🤨 شن تقولي منجد انك قليله ادب
نصيب : نمدح ف عيلتك 🥺
المديرة : لازم نتصل برقم بوك
نصيب : نمله عليك 😒
————————
عبد المولي : حاضر يااستاذه حاضر حاضر
وليد : خير ياشيخ
عبد المولي : لازم نمشي بس والله مني عارف هذي البنت ابصر شن مدايره ف المدرسة ديرين استدعاء ولي الامر !
ايمن كان جنبهم و ضحك طول
وليد : خيرك ياولدي ؟!
ايمن : شيء ياخال كنت سارح
عبد المولي : والله ضروري نمشي المشكله عندي الزاميات ف المدرسة
ايمن : توا نمشي اني ياعمي
عم الصمت و عبد المولي يشبحله ضربه علي كثفه وليد
ايمن زمط ريقه و ابتسم : اني قصدي هي خطيبتي و عادي ف الاخير فاتحتنا الاسبوع الجاي يعني تعتبر من مسؤولياتي
عبد المولي هز راسه : باهي ياولدي برا انت
ابتسم ايمن و طلعع
—————
نادر خش للحوش و عياط ولده معبي الحوش
نادر : استغفر الله ياربي
سالمه : اهلين ياولدي
نادر : يام سكتيه بالله عليك
سالمه : ياولدي مقدرتش الولد يبي امه شوره استنفرني حتي اني
نادر : لا حول ولا قوه الا بالله حطيه ف سريره ديري رايك
سالمة : جرب انت تشده ياولدي بالك يسكت
نادر : لا اني منقدرش ياامي منعرفش كيف اصلا و منحبش نشد الصغار
سالمه : ياولدي شده بلكشي يسكت جرب ياولدي هذا ولدك
نادر شاف لولده و سكت
——————
ايمن خش ف الممر و يسمع فيهم يتناقشو
الاستاذه : زي مقتلك ياحضره المديره مكملت الحصه لين خلاص مقدرتش حسيت بقيميتي طاحت بين الطلبه اهانتني
المديره : لا عندك الحق قليله ادب من وجهها
نصيب خبطتت علي الطاوله و وجها احمر : اني من بكري ساكته و نسمع فيكم قليله ادب ربيتني انتي باش تقوليه الكلام اني سبق و قتلك الاستاذه متفهمش الجماعه كلها مش فاهمين و يخلو ف اماليهم يصرفو عليهم تاني ف الكورسات
الاستاذه : شوفتي مصطلحاتها تقول جماعه هذي طالبه ؟
و حطت صبعها علي نصيب
نصيب : حتي انتي شوفي قيافتك و شعرك مكش شور ابله ره 🤷🏻♀️
خش ايمن و يشوف لنصيب انصدمت لما شافته
ايمن : السلام عليكم
المديره : وعليكم السلام شكون!
ايمن : زوج الطالبة
نصيب فتحت فيه عيونها
المديره بصدمه : ليش هي متزوجه ؟
ايمن قعمز : مش هذا موضعنا اتصلت بوالد و هو مشغول و هي مسؤوليتي فانا جيت
الاستاذه ردعت روحها : كويس انك جيت لانها مستهتره مرتك
ايمن : في شنو انشاء الله
الاستاذه : اهانتني بطريقه غير لائقه
ايمن : شنو قالت ليك
الاستاذه : قتلي اني منعرفش نفهم و ان الطالبه يشكو مني و تستعمل ف الفاظ سوقيه قليله ادب
نصيب : واحد لما يقول الحق يطلع قليل ادب
ايمن : من جيهه الالفاظ السوقيه توا نعرف كيف نتعامل معها اما من جيهه كلام الطالبه فاسئلي الطالبه يفهمو منك او لا و اظن من حق الطالب انه يعطيك علم انه ميفهمش منك هذا من حقه ولا شني يامديره
نصيب : ايه مش يهز راسه بس
ايمن فنص فيها
المديره : في هذي صح رح نسألو الطلبه علي اسلوب الاستاذه ف الشرح معاهم
نصيب : خوافين مش رح يقولوا متفهمش
ايمن : 🤦🏻♂️🤦🏻♂️
المديره : اممم اذن بهذا الشيء انحلت المشكله
الاستاذه : لا منحلتش ضروري تعتذر مني !
ايمن فنص ف نصيب و هي ف غل غلها
نصيب باستفزاز : انييي اسفة يااستاذه ممكن انجرفت ف كلامي بس هو صح ره
و طلعتت
المديره : خلاص يااستاذه تفضلي لصحتك الثانيه
الاستاذه شافت لايمن و طلعت
ايمن : اوك امالا سامحونا و ني رح نعقلها و اني نستاذن
و طلع
لقها تستنا فيه ف الممر
نصيب : انت شن جابك هنايا
ايمن : جابتني سياره 😂
نصيب : شن قصتك مع البراده انت نقصد كيف تجي بروحك وين بوي و كيف تقول انت راجلي ؟
ايمن : ايه بالفعل هيكي مش رح نتزوجو الاسبوع الجاي !
نصيب : رح نتزوجو بس متجوزاناش !
ايمن : بس رح يصير وتوا هييي لسياره
شدها من يديها بعدت عليه و مشت قدامه ضحك ايمن و لحقها
طلعت ركبت ف السياره من تالي وركب هو
ايمن : شن تحسابني السواق متاعك اركبي من قدام
نصيب : لا يابابا وكان يشوفنا حد عيب
ايمن : مالا تبيه يشوفني نكر فيك زي السواق مهيش ليموزين هذي اركبي من قدام
و عقد حواجبه
نصيب : باهي باهي بلا عياط مفرخ
ايمن : اني فرخ تقولي لخطيبك هيكي
نصيب : تعيش و تاكل غيرها
ايمن فتحلها الباب متع الكرسي يلي جنبه بس هي ركبت علي الفودره و نقزت للكرسي يلي جنبه و قعمزت و ربعت ايديها
ايمن : شني تحسي انتي بالحركات هذم
نصيب : نحس ف النو ليك نص ساعه تتامر عليا حرك السياره
ايمن : اللهم طولك ياروح
و ولع السياره و مشي
———————
ايمن : ووصلنا ياخبزة الساعة ستة
نصيب : مضحكش راك 😑
ايمن : 😂
نصيب : مهم هيي سلام
ايمن ابتسم ليها : مع السلامة
ابتسمت ليه نصيب و نزلت من السيارة
و كملت طريقها للحوش بتفتح الكنشيلو
وقفها صوت
___ و ني نقول علاش الكف الصبح و جو التجاهل كله علي خاطر يلي راكبه معـاه !
نصيب لفتت لقته قدامها
نصيب : سراج 😟